كل ما تريد أن تعرفه عن سنة الإمتياز وما بعدها ..

اهلا بكم اخواني واخواتي في الكفاح غير المسلح في مرحله جديده من عمركم الوردي .. احب الاول انكم تفهموا بعض الخطوط العريضه لما انتم مقبلين عليه .. انتم دلوقتي في مرحله الامتياز ودى يمكن تسميتها بال incubation period or transational zone بين مرحلتي الدراسه والعمل والممارسه الفعليه

فبعد ان يفني هذا الامور ست سنوات من عمره في حفظ واستذكار معلومات كئيبة بطبعها من ملخصات ومذكرات الاستاذ الدكتور ياسر الفكهاني لانها الاسرع والانجز في اداء الامتحان الموضوع غالبا لقياس سرعة الاداء بين الممتحنين وكل ماتكتب اكتر فرصتك في الفوز تكتر وقد تدخل السحب الكبير على النيابات والوظائف وانت وحظك لوخربشت الورقة الكسبانة... وتطلع النتيجة, وزغرتي ياأم أشرف والبقية في حياتك ياعمور وأهم حاجة انك عملت اللي عليك والمهم انك تتعلم في الامتياز بتاعك

في الامتياز أرجو ألا تندفع في ممارسة الطب من منطلق أنك عرفت كل حاجة بدون أن تكون لديك خطة لما هو قادم فالتعجل غير مطلوب .....انا بقول الكلام ده مش علشان احبطك او اتنطط علي معاليك ولكن لسببين اهم من بعض :-

الاول انك لازم في مسيرتك الطبيه تعرف مقامك كويس وده يخليك محدد انت فين وهتطور نفسك لأيه وكمان هيسهل تواصلك مع اللي حواليك
ثانيا بقي لما تيجي تختار شغل بلاش العيادات يعني بلاش الحاجات اللي هتبقي مسئول مباشر فيها وهنتكلم بعدين عن الموضوع ده ان شاء الله

نيجي بقي للامتياز اهم حاجه نبتدي بيه هي اهدافك في الامتياز

1- الهدف الأول و الاهم و بلا نزاع هو طريقك بعد الامتياز وده اول خطوة فيه هو تحديد التخصص و التخصصات عموما لا تخرج عن :-
اولا ليها علاقه بالباطنه ودى تخصصات اهم ما فيها القراءة والمذاكرة وانك تشوف حالات كتير وهي تخصصات كويسه جدا لبتوع الصحه او التامين لانها بتعتمد الي حد كبير علي نشاطك ومذاكرتك وان كان منها تخصصات فيها interventions هتبقي واقع في الجزء ده منها لو مكنتش في الجامعه او في معهد تعليمي التخصصات دى علي رأسها cardiologyو ICU وبقيه تخصصات الباطنه العامه
شبهها جدا تخصص الاطفال وكمان الاشعه والتخدير ولو ان التخدير في الماستر بيعتبر تبع الجراحه لكن في الحقيقه هي باطنه

ثانيا : تخصصات ليها علاقه بالجراحه ودى طبعا كل SPECIALS الجراحه اللي درستها في سته ومعاها النسا والرمد والانف واذن ودى كلها تخصصات برة الجامعه او المستشفيات التعليميه لازم تفكر ميه مرة قبل اختيارها

2- الهدف الثاني تحدد انت ناوى تكمل في مصر وتبقي سكه تكليف ونيابه عاديه وللا السفر برة والمعادلات
بالنسبه لمعادلات امريكا واستراليا وكندا توكل علي الله وابتدئ في الامتياز بدرى بدرى ويبقي في نهايه الامتياز تمتحن الجزء الاول منها
الزمالات غير زماله الجراحه صعب تاخد فيها خطوة في الامتياز يبقي تصبر كده وخدها في النيابه لما تبقي رسيت كده وفهمت الدنيا ماشيه ازاى
ابدأ بدرى حدد لنفسك تخصصين تلاته اقضي الامتياز عليهم ويبقي هدفك تعرف الاماكن اللي ممكن تقضي نيابتك فيها والبرايفت اخبارة ايه في التخصص ده وطبعا التحضير فيه ظروفها ايه دى اهم حاجات تسأل عنها في اى تخصص

3- الهدف التالت الشغل وده احسن شغل واللي بيجيب فلوس فعلا هو اللي في معامل التحاليل والاشعه او في استقبال المستشفيات الخاصه بلاش شغل المستوصفات لانك ممكن تحس انك دكتور بجد ودى تبقي بدايه النهايه بجد هتخش سكه الفلوس وهتنسي اى احلام انك تبقي طبيب كويس ويبقي تفكيرك كله علي انك Money maker الشغل طبعا في المعامل مش هيضيفلك اى تعليم كطبيب بس اهو مصدر للفلوس بجانب التعليم في الامتياز طبعا في المكان اللي هنبقي نحدده بعدين

نيجي بقي للتعليم في الامتياز

بصوا بقه انت عموما ادامك طريق من تلاته

1- لو كنت محظوظا وقضيت امتيازك في الجامعة تجد انك مضطر يوميا للاصطباح بوش نائب كئيب ومتوحش حالف ليطلع ايمانك لان الدكتور رئيس القسم اهانه مرة اخرى وقال له انه حمار ومعفن.. كل ده ياحلو طبعا غير نوبتجيات المستشفى اللي المفروض تنتظر فيها داخل القسم لمدة تتراوح من 6الى 12 ساعة

يلا شييت الحالات دي..

يعني يعمل شييت عدم المؤاخذة ..يعني الحالة تدخل عليه ويبتدي يسألها اسئلة مثل.. اسمك.. يبتشتغل ايه .. بتشرب سجاير؟ ليه كدة ياكلب..الحالة جتلك من امتى؟..حد في العيلة زيك كدة ولا انت لوحدك..حملتي كام مرة ياحاجة؟..ايه ده انتي ماكنتيش بتنظمي..نهار ابوكي غامق عندك ضغط او سكر..طب احلف...الخ من اسئلة مملة الغرض منها ملأ الشييت اولا واخيرا وطبعا يستحيل ان النايب يضيع وقته السمين في هذا الهراء ومثل هذه الاعمال الوضيعة تترك للناس الوضيعة..ماتزعلش.. واهو كله يهون عشان رضا النايب اللي ممكن بمذكرة صغيرة يوصي باعادتك للترم لانك غير متعاون وغير منتظم في الحضور وماتربيتش اساسا..اوعى تعمل مشاكل مع النايب لان النواب احباب الله..

2- المعاهد والمستشفيات التعليميه احسن مكان ممكن تتعلم فيه في الامتياز وانت عليك العين من حد اكبر منك يعلمك وميسيبكش تتورط في الغلط لكن الموافقات عليها صعبه ولو ناوى عليها روح من الاول الامتياز لان بعد كده انسي تجيبها خصوصا القاهرة طبعا

3- لو كنت اكثر حظا وقضيته في مستشفيات وزارة الصحة فالامر مختلف تماما ..فالنائب هناك من ارق والطف خلق الله..ونفسه و منى عينه ان يعلمك ماينفع لتحمل عنه عبء العمل وضغطه..دعك من انك حر في الذهاب للقسم الذي تختار ولو سألت سؤالا .. الف من يجيبك واذا اردت معرفة نتيجة التحليل الخاص بمريض ما فانتظر انت هنا ياسعادة الباشا والعامل او الممرضة ستذهب لاحضار النتيجة من المعمل وانت جالس معنا كاللوردات ... لكن المشكلة تكمن في ماستتعلمه لان نائب الصحة لايفوقك علميا باكثر مايفوقك خبرة..سنة او سنتين على الاكثر تلك الخبرة التي كونها من نائب اكبر منه عندما كان في مثل سنك وبدأ يتعلم الاحتكاك العملي بالمرضى. بس هتاخد شغل السوق اللي بيجيب شغل وفلوس من الاخر كده وسيبك بقي من التعليم والقراءه وخلافه ده غير نوبتجيات الاستقبال اللي هتشيلها في الغالب وحدك بس لو كنت ناوى جراحه يبقي فرصه كويسه تمشى ايدك وتكتسب جرأه لكن المهارة تبقي في الجامعه او جراحي الصحه الكبار اللي مش هتشوفهم

بالنسبه للاجراءات بقه

* سنه الامتياز 12 شهر
اتنين لكل من الباطنه و الاطفال و النساء و الجراحه
واحد لكل من التخدير و الإستقبال
يتبقي شهرين لتخصصين تختارهم بواقع شهر لكل تخصص ( واحد من الباطنات وواحد من الجراحات )
* اول كل شهر او شهرين علي حسب ترتيب جدولك تروح لشئون العاملين في الجامعه بتكتب فورمه هتحفظها بعدين انك هتاخد الشهر ده في الجامعه في الحاله غالبا بتسيبلهم الورقه وهم بيجيبوا موافقه رئيس القسم الامور توماتيكي توماتيكي او هتروح تمضيها من اى استاذ او رئيس القسم ووترجعهالهم
* لو رايح الصحه بتاخد ورقه من الجامعه بترشيحك ليهمم وتروح بيها لمدير المستشفي بيحولها لرئيس القسم اللي انت رايحله يمضيها وتروح شئون العاملين يمضوها وتوديها الجامعه وخلاص كده
* في نهايه المده بتمضي اللوت بوك من النايب و رئيس القسم وتتختم سواء في الصحه او الجامعه متفرقش
* الترتيب يختلف حسب مجموعتك في الجامعه
بيبقي عليك في جميع التخصصات نوبتجيات طوارئ بدلا من نوبتجيات القسم لو كنت في الصحه
في الصحه فيه نوبتجيات طوارئ مع نوبتجيات النساء يعني جهز نفسك شهرين طحن طحن طحن لو في الصحه

بالنسبة لأنسب الأماكن لكل تخصص

اللي عاوز باطنه لازمن حتمن ولابد يبقي فيه كونتاكت ببتوع الباطنه في الجامعه
الجراحه عليك و ع الصحه تمد ايدك وتتجرأ وتاخد شغل السوق بس التعليم في الجامعه مش هتمد ايدك
الاطفال = الباطنه بالظبط والنساء = جراحه
بس في النسا حاول تحضر العياده اكتر من العمليات في الاول تشوف الفحوصات وامراض ال gyn. وبعدين بقي ال obst

التخدير اهلا بيك يا معلم اروش شهر ببساطه دكتور التخدير عارف انك مش هتاخد تخدير وهو مش طالبه يشوفك اصلا وانت متلزموش حيث الديرتي في شغله قليل فمن الاخر مش محتاجك لكن لو وريته انك مهتم بالتخدير ولقاك لازقله هيظبطك ولو مشافش وشك متقلقش مش هيزعل

خلي بالك الطب كله كوم وسنة الامتياز كوم تانى

الامتياز بجد متريحش فيها لان دى اهم سنة فى حياتك و حتفرق معاك كتير

لازم في الامتياز تحدد ال pathway بتاعك مش تسيب نفسك الدنيا تاخدك ترميك في التكليف. اثناء الامتياز وانت لسه عالبر حدد هتمشي مشوارك ازاى وهتركب اى قطر وهتمشي مع اى ركب.دى اهم نقطه في الامتياز حدد طريقك اثناء السنه دى وارسم ملامح خطتك في الحياة

متتحرجش ان يتقال عليك ميزو او بلاد كارير او اسسيندينج ديسسيندنج وايت كوتيد موتايل اورجانزم سمعنا الكلام دا كتير بس هتعمل ايه
فعلا لو متعلمتش فى الامتياز وبقيت قوى هتبقي ضعيف كـ G.P يعني عاوز تبقي جي بي محترم يبقي الامتياز و بعد كده في تخصصك وحياتك المهنيه الحقيقيه يبقي النيابه هي حياتك

متستعجلش على الفلوس اكثر من اللازم .اتعلم كويس واللى هتتعلمه ان شاء الله هيجيب لك فلوس اكتر بكتير ومهما البرايفت جاب فلوس لا تساوى اى شئ امام اللى هيفوتك

خلي بالك إن النواب بيحسدوا اطباء الامتياز على الراحه وعدم المسئوليه يعني انت انسان غير مسئول بالمره امامك فرصه كبيره للتعليم استثمر الفرصه دى

امشى فى كل التخصصات ابدا بالعيادات الخارجية فى كلة الاول علشان انت هتبقى ممارس عام بعد كدة ومتبداش مثلا تتعلم ازاى تعمل زوايد بدون ما تعرف تشخص عين سمكة يعنى المهم تلم الحاجات الصغيرة الاول وبعدين دوس وزاكر واقرا فى اى مجال زى ما انت عايز

اهم اماكن حتتعلم فيها : الاستقبال ( الطوارىء ) - طوارئ الباطنة - طوارئ الجراحه - الولادات فى النساء .. لما تلاقى اى حد بيركب اى حاجة روح شوفه بيعملها ازاى مرة واتنين و اعملها انت تالت مرة خد سنة .. فيه ناس للاسف مبدئها ان اللى شربت فيه المر متديهوش لحد بالمعلقه - و ناس تانى عكس الكلام ده خالص

دكتور الامتياز ده عباره عن نحله - قمه النشاط - مسؤليه محدوده - احلى سنه هتشوفها فى المهنه بلا منازع
و طبعا النحل هيروح للورد اللى همه النواب و كل ورده و ليها مزايا و عيوب و انت فى امتياز تدور على الورده اللى هتفيدك - مش مهم منظرها و لا ريحتها المهم المحتوى

الناس اللى ممكن تنفعك ممكن تكون صعبه شويه فى المعامله و ده الغالب - النايب اللى بتشيله فى الديرتى هيعلمك التانى - اللى تلاقيه عموما محبط و مش راضى بقسمته ابعد عنه بدل ما يكرهك فى الطب

حاجه أخيره احب اضيفها : المشرط له بريقه فأحذر منه حتى لا تكون انت ضحيته

ايه النظام بعد الامتياز ؟!

ان شاء الله فى اخر شهر فى الامتيازهتسحب مظروف التكليف وتلصق الرغبات وبتدخل تنسيق بمجموعك والنتيجه بتبان بعد اسبوعين تقريبا
بعدها تستلم التكليف والتكليف دا معناه انك بقيت طبيب ممارس عام على الدرجه التالته الماليه لك ما لاى موظف من حقوق وعليك ما عليه من واجبات طبعا التكليف دا مينتهيش الا باستلام النيابه او الزماله

بعد شوي الأطباء حديثي التخرج على شواية الامتياز ... دخل الجامعة مرة أخرى من دخل (كنواب في المستشفى الجامعي) .. وذهب للصحة من ذهب ( وهؤلاء انقطعت أخبارهم , وذهبت ريحهم )

التكليف - أدام الله فضلكم - هو محطة الترانزيت التي يمر بها الطبيب تمهيدا لتخصصه ... باطنة , جراحة , أطفال , أشعة ...كل حسب ميوله

فالأطباء المكلفون هناك يقاسون السواد ,تقدر تعتبرها عقوبة نفي جماعية ... سواء كنت مؤيدا للنظام , أو من المناضلين العظام .. ذو نباهة أو ذو ريالة .. ثوريا كنت أو دلدولا....فالكل في التكليف سواء

تعال يامحترم ننظر لتقدير الدولة لموظف بدرجة طبيب في مستشفيات وزارة الصحة ...المرتب الأصلي + الحوافز + البدلات (بدل عدوى .. بدل طبيعة عمل .. بدل ماحد يلهفهم ...الخ) كله كله قد يصل الى 250 جنيه مصري أبا عن جدا ...مقابل تلك المرتبات (المغرية) يشترط تواجدك بمقر عملك يوميا من 8 صباحا الى 2 مساءا ..بالاضافة الى النوبتجيات ياحزين ... النوبتجية 24 ساعة ..تسلم زميلك التالي 8 صباحا , واذا لم يحضر فستضطر اّسفا لقيام الليل والنهار والعصرية وشمس الأصيل حتى يبان لك أصحاب

اذا فأنت ممنوع من ممارسة العمل الخاص الذي يدر بعض النوى لسند الزير ... فالمستشفى (مالية عليا حياتي) .

إنها السلسة الغذائية .. طبيب امتياز .. ممارس عام ... نائب ... أخصائي ... استشاري .... ويمكن ربنا يفتح عليك وتترقى وتبقى فيل

ميكانيزم السلم الخلفي : (النقطة دي مهمة ياجماعة) .. حيث أن النظام ضاغط بطبعه فهو لم ينس عمل فتحات لتنفيس البخار ... وميكانيزم السلم الخلفي أقصد به حالة الارتخاء الحادة والاهمال الشديد في المستشفيات والوحدات (بمعنى أنها نتيجة وسبب أيضا) فأنت فعليا لن تلتزم بالحضور يوميا , وعملك سيكون بمعيار (على أد فلوسهم) , وتعاملك مع المرضى سيكون مرهونا بحالتك النفسية التي هي غالبا (تعبان .. طهقان.. متضايق) ... والوزارة والمديرين والموظفين عارفين كل هذا ... لذلك تجد التركيز الاساسي على الحضور والانصراف والمباني والشكليات الخارجية داخل علبة الكرتون الفارغة تلك ... فان أتاك مرور عابر أو تفتيش مفاجيء يوم الأربعاء 9 صباحا وكنت متغيبا فتحقيق اداري وجزاء يسفر عن خصم من الراتب وتسجل في ملفك الوظيفي , وان كنت حاضرا فأنت شاطر وتستحق نجمة في الكشكول (لا أقصد مكافأة طبعا ... كفاية انك أفلتّ من التحقيق) لكن أحدا لن يسألك عن مستواك العلمي , كيفية تعاملك مع الناس , اهمالك في علاج الحالات ... فكل هذا كلام فارغ لايرقى الى مستوى الدفاتر والعهدة والروتين المقدس... وبالتالي تزداد انت استهتارا , فتزداد المستشفى سوءا , فيزداد التفتيش توحشا ,........ وهكذا في حلقة مفرغة

البعض يعترض على تلك النعمة ويخلع بنطلون الميري المقدس ... يستقيل من الوزارة , هنا يحصل على لقب ( طبيب حر) ... وهو - لعمري - وعيني وعافيتي للقب غالي ... فهو يعفيك من الانتظار في طابور المكدسين لتسجيل الدراسات العليا فأنت لم تعد على ذمة الصحة وتسلسلها الوظيفي .. أنت الاّن حر ياعلي ... لكنك بدون البنطلون الميري ياحسرة , هنا يلجأ الخريج الحديث لحل شيطاني اّخر ... ميكانيزم أهل الخطوة

ليه تستقيل من الصحة لما ممكن تبقى بروحين ؟ ... بمعنى أن يقوم الممارس العام في بداية تكليفه بضرب شهادة طبيب حر (خليك بجح وقول تزوير) وهي شهادة تفيد أنه مستقيل من الصحة ,يقدمها المحروس الى الجامعات المصرية لقبول تسجيله بالدراسات العليا ... في نفس الوقت فهو لازال على ذمة الوزارة يمضي الحضور والانصراف ويكشف على المرضى في المستشفى أو الوحدة ويقبض راتبه بانتظام , وتوقع عليه الجزاءات أيضا ... ويحضّر دراساته العليا كمان , وكدة احنا في السليم , كل هذا في نفس الوقت ...

النيابات والزماله نوعين :

نوع ملح بمعنى انه لا يشترط قضاء اى فتره فى التكليف واللى بيحدد التخصصات الملحه لجنة التكليف او الزماله وغالبا بيبقى منهم التخدير والتحاليل والطب النفسى والعنايه المركزه والطوارئ وطب الاسرهوممكن تزيد بعض التخصصات زى ما حصل السنه دى

النوع التانى باقى النيابات وتخصصات الزماله والشرط انك تكون قضيت عام عمل فعلى بالتكليف
النيابات والزماله بينزلوا مع بعض فى شهر مايو او يونيو من كل عام .. الزماله بتختار تخص واحد فى 5 محافظات .. النيابه لك 24 رغبه لو بتقدم نيابات ملحه و48 رغبه لو نيابه عاديه

أرجو أن أكون قد أفدتكم

المصدر .. مواقع عديدة
الإعداد .. حوالي 3 ساعات

.