أيعجز أحدكم أن يكسب كل يوم ألف حسنة ... ؟!

عن سعد رضي الله عنه قال كنا عند رسول الله – صلى الله عليه وسلم – فقال " أيعجز أحدكم أن يكسب كل يوم ألف حسنة فسأل سائل من جلسائه كيف يكسب أحدنا ألف حسنة ؟ قال: يسبح مائة تسبيحة فيكتب له ألف حسنة أو يحط عنه ألف سيئة "

فكرت ليه الرسول – صلى الله عليه وسلم – استخدم لفظ " أيعجز " يعني الموضوع سهل قوي

طبعا المفروض ان عظم الجزاء على عظم العمل .. لكن فيه أحاديث فضائل الأعمال تلاقي ثواب كبييير على حاجة بسيطة وسهلة خالص .. تعرف ليه ؟

اسمع الحديث ده وانت تعرف

قال – صلى الله عليه وسلم – " ألا أنبئكم بخير أعمالكم وأزكاها عند مليككم وأرفعها في درجاتكم وخير لكم من انفاق الذهب والورق وخير لكم من أن تلقوا عدوكم فتضربوا أعناقهم ويضربوا أعناقكم ؟ قالوا بلى قال: ذكر الله تعالى "

متخيل مكانة ذكر الله تعالى " خير الأعمال وأفضلها وأرفعها درجات وأفضل من الانفاق في سبيل الله والجهاد في سبيل الله طبعا بمقارنة الجهد والتعب مع الأجر "

علشان كده ... يقول – صلى الله عليه وسلم – " مثل الذي يذكر ربه والذي لا يذكر ربه مثل الحي والميت "

ياااه .. الثواب كبير قوي واحنا عندنا أوقات كتيير قوي فاضية .. تعرف ان فكرة الموضوع ده جت من وقت من الاوقات دي .. قاعد عادي زي ما كلنا بنقعد اوقات مبنفكرش في حاجة أو سرحانين في حاجة أو ماشيين رايحين الكلية لوحدنا وبنتفرج على الشوارع والناس حوالينا أو قبل ما ننام .. شوفت الحديث الأول ده وفكرت فيه وقلت يعني كلها اوقات مبنعملش فيها حاجة وممكن نذكر ربنا سبحانه وتعالى وناخد ثواب كبير

ناخد كمان حديثين ...

قال – صلى الله عليه وسلم – " من قال سبحان الله وبحمده في يوم مائة مرة حطت خطاياه ولو كانت مثل زبد البحر "
تخيل .. في دقيقة واحدة ممكن تحط عنك كل خطايا اليوم .. وياه بقى لو عملت كده كل يوم – علشان كده دي من أذكار الصباح والمساء – تحط عنك خطاياك يوم بيوم وان شاء الله تقابل ربنا سبحانه وتعالى من غير خطايا خالص .. بسبب ذكر بسيط لله سبحانه وتعالى

قال – صلى الله عليه وسلم – : " من قال حين يصبح وحين يمسي سبحان الله وبحمده مائة مرة لم يأت أحد يوم القيامة بأفضل مما جاء به إلا أحد قال مثل ما قال أو زاد عليه "
طبعا .. متخيل حجم الثواب لم يأت أحد يوم القيامة بأفضل مما جاء به

قال – صلى الله عليه وسلم – " كلمتان خفيفتان على اللسان .. ثقيلتان في الميزان .. حبيبتان إلى الرحمن سبحان الله وبحمده سبحان الله العظيم "

كمان حديثين معلش ثلاثة بس بجد ثواب محصلش

قال – صلى الله عليه وسلم – " إن من أحبكم إلي وأقربكم مني مجلسا يوم القيامة .. أحاسنكم أخلاقا "
بجد ... لا يمكن نسمع الحديث ده ومانكنش من أحسن الناس أخلاقا

قال – صلى الله عليه وسلم – ‏"‏ من كظم غيظا، وهو قادر على أن ينفذه، دعاه الله سبحانه وتعالى على رؤوس الخلائق يوم القيامة حتى يخيره من الحور العين ما شاء ‏"‏
نعفو يا شباب .. ونسامح الناس .. ونكظم الغيظ حتى لو نقدر ننفذ

آخر حديث معانا حديث ثوابه كبير قوي وهو دعاء دخول السوق قال – صلى الله عليه وسلم – " لا إله إلا الله وحده لا شريك له له الملك وله الحمد يحيي ويميت وهو حي لا يموت بيده الخير وهو على كل شيء قدير "
وثوابه كتب الله له ألف ألف حسنة ومحا عنه ألف ألف سيئة ورفع له ألف الف درجة
أنا بعدّي مخصوص من الطريق اللي فيه السوق علشان أقول الدعاء ده


ان شاء الله كل الأحاديث الواردة أحاديث صحيحة وأقلها أحاديث حسنة

ودي بقى هدية الموضوع ممكن تسيّفها على جهازك وتبص فيها كل فترة