خلّي الأجازة دي .. أحلى أجازة في حياتك !!

السلام عليكم ورحمة الله وبركاته ... كل شباب أولى وتانية وتالتة .. وأكيد كل شباب الكليات التانية " كل سنة وانتم طيبين " سنة كاملة من المذاكرة والحضور والتعب عدت – بفرض انك في طب - ... وجت الأجازة .. وكل أجازة بتيجي تحمل معها آمال وأهداف وطموحات عديدة ... وكالعادة بنيجي في آخر الأجازة نلاقي نفسنا معملناش حاجة .. الأجازة دي بقى لازم نحس بفرق .. وان شاء الله نعمل كل اللي عايزينه وتبقى أحسن أجازة

أول حاجة ... لازم يكون عندك هدف في أجازتك

لازم يكون عندك هدف لأن الهدف ده طاقة داخلية ودافع كبير جدا بيغير كل حاجة في حياتك علشان تحقيق هدفك ده .. اعتقد انك لا يمكن تسافر سفرية مثلا إلا وانت عارف رايح امتى ؟ وازاي ؟ وجاي امتى ؟ وازاي ؟ وميزانيتك كام .. اكيد بتحسب كل حاجة وتخطط لها ... تخيل بقى رحلة حياتك .. حياتك كلها .. ينفع ما تخططش ليها ؟!

ولأنك من غير هدف ما توصلش لحاجة .. وكلنا عارفين حكاية " أليس .. في بلاد العجائب " لما سألت القطة قدامي طريقين .. أروح فين وامشي في مين فيهم ؟ ردت القطة انتي عايزة تروحي فين ؟.. قالتلها معرفش .. قالت خلاص طالما متعرفيش امشي في أي طريق وهو يوصلك لأي حاجة

ولأنك من غير هدف .. يحقق الآخرون أهدافهم على حسابك ... بجد ما انت من غير هدف لكن هو عنده هدف بيحققه على حسابك

عندك كام جانب في حياتك ممكن تحط له أهداف ؟

فيه جانب روحاني .. عايز أصلى الفجر كل يوم , وأقرب من ربنا أكتر , واعمل خير أكتر ما انا في أجازة
فيه جانب صحي .. أنام كويس , واهتم بصحتي , واكون دايما في أحسن صحة ما انا في أجازة
فيه جانب شخصي .. حياتك الخاصة طورها .. واديها حقها اللي كان مهضوم في الدراسة ما انت في أجازة
فيه جانب علاقات عامة .. أكيد ارايبك اللي انت قصرت فيهم في الدراسة .. وصحابك .. ومعارفك ما انت في أجازة
فيه جانب مهني .. طور نفسك واقرا واتعلم كتير عن مهنتك سواء كنت شغال فيها أو مهنتك المستقبلية بعد ما تخلص دراستك ونمِّ مهاراتك ما انت في أجازة
فيه جانب مادي .. ممكن تحقق فيه أكتر .. لو انت عايز ما انت في أجازة

أكيد كلنا عندنا الأفكار دي .. بس ليه ما بتتنفزش ؟!

لسبب ان 3% بس من الناس عندها هدف واضح ... وده يجي ازاي ؟

لازم تبقى عندك رغبة انك تعمل الأهداف دي .. مبتفكرش فيها وبس ... ولازم تتعلم تعملها وتدرب نفسك عليها ... ولو عرفت تعملها يبقى لازم تحطها في الفعل ... وميبقاش ناقص غير انك تلتزم بالأهداف دي وتحافظ على إستمراريتها .. وكل ده لازم يكون مكتوب وواضح قدامك

وخليك صريح مع نفسك ..

انت فين دلوقتي .. بالنسبة لهدفك ,, وليه عايز هدفك ده .. علشان تزود رغبتك في الوصول للهدف ,, وازاي توصل له .. حط كل مصادرك وخبرتك وتعليمك وحياتك والناس اللي تعرفهم .. كل الامكانيات اللي معاك ,, ومتنساش ان أكيد فيه تحديات ممكن تواجهك فكر فيها وحاول تقرر ازاي تتجاوزها .. وكل ده لازم يكون مكتوب وواضح قدامك

وبعد كده .. ناقص انك تعمل " وقل اعملوا ... " وتتأكد " إنا لا نضيع أجر من أحسن عملا "

اعتقد إنك كده ممكن تحقق أي هدف في أجازتك ... وساعتها تكون أحلى أجازة في حياتك